Anninnia

Como s’ammentu de mama chi mi cantat s'anninnia

Est sa fortuna prus manna de totu sa vida mia.

Cussa boche delicada prus de fozas de una rosa

Mi torrabat s’alligria olvidande donzi cosa.

Si sos mortos chene lughe ti trubbaban su dormire

Chin su sinnu de sa rughe 'che los faghias fughire.

Anninnia, anninnia, anni-oh…

In sa vida non ti lassat solu mai,

Pitzinnia e betzesa, est semper gai.

Como deo canto s'anninnia a tie

Chin s’amore chi la cantaias a mie.

Anninnia, anninnia, anni-oh…

Cuss’affetu, cussu caentu chi mi dabas chin su sinu

No m’an dadu àteras chentu ch’apo pérdidu in caminu

Ca sa mama ch'amus tentu est che i’su sole, che i’sa luna:

In su chelu b'ind'at chentu, pro su fizu contat una.

Si abbàidas in su chelu, chin sa cara punt’a susu,

In mesu de sas istellas una lughet de pius.

Anninnia, anninnia, anni-oh…

In sa vida non ti lassat solu mai,

Pitzinnia e betzesa, est semper gai.

Como deo canto s'anninnia a tie

Chin s’amore chi la cantaias a mie.

Anninnia, anninnia, anni-oh…