أنا والبواخر [Ana Wel Bewakher] lyrics

يحن خفّاقي لا شفت البواخر

تعدت الشاطي وغابت في الأمواج

تبحث على لولو طبيعي وفاخر

يزهى نحر من هو يحب التغنّاج

والعود الأزرق لا احترق في المباخر

ما يشبه إلا ريحه العذب لا فاج

واليوم ينـظر لي بمنـظـور ساخر

كنّه يريد يسبب لقلبي إحـراج

ياللي بدا وصلك معاي يتباخر

لا ترتجي من صاحبك ضحكة حجاج

سوس الهجر في عظم الأشواق ناخر

والحزن في روض المحبين دَوَّاج

من التغطرس ، والكبر ، والتفاخر

ما جبت لجروحي من فراقك علاج

على كثر ما كنت يا زين ذاخر

في مملكة قلبي لك العرش والتاج

من قلب بالشيمة وبالعزم زاخر

أقفيت وأنا عاليٍ مثل الأبراج

والله لو إنك أول إنسان ، وآخِر ..

إنسان .. ما أحتاجك ولو كنت محتاج