Alla [Transliteration]

Муҳаббатдан яралганларим,

Алла, болажонларим, алла.

Бор бойлигим, кўнгил зарларим,

Алла, болажонларим, алла.

Сиз жисмимга, жонимга устун,

Бир онаман мен, бағри бутун.

Меҳрим фидо бўлсин сиз учун,

Алла, болажонларим, алла.

Бирингиз гул, бирингиз булбул,

Сизга боқсам, жонимга ҳузур,

Худойимга беҳисоб шукур,

Алла, болажонларим, алла.

Улғайингиз юрт сўраб яшаб,

Элингизга бахт тилаб яшаб,

Яхшилар кўп, уларга ўхшанг,

Алла, болажонларим, алла.

Жонимдаги жонларим, алла,

Тушимдаги дурларим, алла,

Худо берган дурдоналарим,

Боқий бахтим, жонларим, алла.