'A ricetta 'e Napule [Romanian translation]

Nu vecchio milionario americano,

teneva nun se sa che malatia,

era nefrite, tisi o pecundría?

'A scienza nun sapeva andiviná.

Però un amico intimo dicette:

"Pe' guarí 'a 'sta malatia,

portiamolo in Germania,

ce stanno pruffesure 'e chirurgia".

E 'o juorno appriesso, 'ncopp'a nu vapore,

passaje ll'oceano 'o povero signore.

'E meglie scienziate berlinese

'o visitajeno senza capí niente,

però, sapenno ca ce steva 'argiento,

dicettero: "Tentiamo d'operá".

Senza nisciunu scrupolo

'tagliajeno 'o cuorpo 'e chillu vicchiariello

e, quanno fuje a ll'ùrdemo,

campava e nun campava 'o puveriello.

E quase quase, tanto d' 'o dulore,

steva saglienno 'ncielo add' 'o Signore.

Ma Napule, vedenno stu vapore

ca se purtava 'o viecchio quase muorto,

dicette: "Favorite dint' 'o Puorto,

tengo na cosa ca lle pò giuvá".

Pigliaje nu poco 'e Vommero

cu vinticinche gramme 'e Margellina,

nu pizzeco 'e Pusilleco

e 'o preparaje na bella mmedecina.

E 'o viecchio, nun appena s' 'a pigliaje,

dint'a nu quarto d'ora se sanaje.

Chest'è 'a ricetta 'e Napule:

nu poco 'e sole vi' che te cumbina.

Pure chi è muorto 'e sùbbeto

venenno ccá, risuscita e cammina.

Nun ce vò' menta, cedra e fronn' 'aruta

pe' sta sempe benissimo in salute.