1lugal-e mu-ni nij2-ul-ce3
2ud su3-ra2 ka pa ed2 ak-de3
3dcul-gi lugal urimki-ma-ke4
4a2-na za3-mi2-bi-im kalag-ga-na cir3-bi-im
5gal-an-zu nij2-saj-bi-ce3 ed2-a-na mu da-ri2-bi-im
6cag4-bal-bal-a ejer ud-da-ka cu-a bal-e-de3
7kalag-ga dumu dnin-sumun2-ka-ra
8jectug2 ejer-ra-bi igi-ce3 mu-un-na-de6
9a2-ni cir3-ra silim-ce3 mu-un-e
10dim2-ma nij2-sag9-ga cag4-ta DU-a-ni ni2-bi i3-balaj-e
11lugal a lugal-e ru-a nin-e tud-da-me-en
12dcul-gi-me-en dumu-gir15 cag4 zid-ta nam dug3 tar-ra-me-en
13tur-ra-ju10-ne e2-dub-ba-a-a-am3
14dub ki-en-gi ki-uri-ka nam-dub-sar-ra mi-ni-zu
15nam-dumu-gir15 je26-e-gin7-nam im nu-mu-un-sar
16nam-dub-sar-ra ki nam-kug-zu-ba lu2 im-mi-re6-re6
17zi-zi-i ja2-ja2 cid nij2-cid-de3 zag im-mi-til-til
18dnanibgal sig7-ga dnisaba2-ke4
19jectug2 jizzal2-la cu dajal ma-ni-in-dug4
20dub-sar jal2 taka4-a nij2-e nu-dib-be2-me-en
21sa pirij tur-gin7 zig3-ga-ju10-ne
22ance-pirij-gin7 kac4 kalag-ga di-ja2
23cag4 an-na-ke4 hul2-la ma-ab-de6
24a-la-ja2 den-lil2-le gu3 zid ma-ni-in-de2
25nam-si-sa2-ju10-uc jidru ma-an-cum2-mu-uc
26gu2 kur-kur-ra-ka jiri3 ba-da-gub
27jictukul-ja2 mu-bi sig-ce3 mu-un-jal2
28aga3-kar2 sig10-ga-ju10 igi-nim-ce3 mu-un-jal2
29me3 cen-cen-na um-ta-ab-ed2-en
30ki ib2-dug4-ga den-lil2-la2-ce3
31ama erin2-na-ju10-u8 igi-ce3 ba-du-un
32igi-bar-ra-ju10-u8 a-cag4 ba-ab-zalag-ge-en
33je26-e-me-en jictukul-la a-la mu-un-ja2-ja2-an
34urudcukur urudma-sa-tum a-ba-da-ab-jal2-le-en-na
35kucda-lu-uc2-a a2-sig3-ge-bi mu-zu
36im-dug im-lag hul sig3-ga-ju10
37mir im ne3-jal2-la-gin7 dal-le-da-bi
38cag4-dib-ba-ju10-u8 la-ba-ab-dib-be2-en
39ni2 zi-ir kur-re ba-ab-cum2-mu-un
40cec gu5-li-ju10 cul dutu-am3
41ki zi-cag4-jal2-la-ka igi mu-na-ni-du8
42dcul-gi-me-en dalla ed2-bi-a inim mu-un-da-bal-e-en
43dijir igi sag9 me3-ja2-a-kam
44cul dutu kur-ra ki aj2 dlama jictukul-ja2-kam
45inim-ma-ni-ce3 ga-mu-un-kalag-ge la ga-mu-un-ne3-e
46me3 jic jic-e la2-a-ba dutu ja2-a-ar ma-an-ed2
47jictukul igi-nim-ma dug3-ja2 bi2-tar
48sig-ce3 elamki-ma gu3-ba jic ma-ab-us2
49ki bal jictukul-ja2 a-na ba-zig3-zig3-ga
50nam-lu2-ulu3-bi ce sahar-ra-gin7
51ki-en-gi ki-uri ha-ba-ni-du8
52nij2-ak-a-ja2 ni2-bi ga-balaj
53kalag-ga-ja2 mu-bi a2 bi2-su3-ud
54jectug2-ju10 nij2-galam-ma sug4-ga-am3
55a-na-ju10 nij2-ka-ge dib-ba-nu
56nam-nun-da du-du-a-ju10-ne
57u2numun2 jic-hul u2numun2 jic-hul zukum-ma-ju10-ne
58til-lu-ug til-lu-ug-da nij2-zi-jal2 edin-na dab5-dab5-be2-da-ju10-ne
59ur-mah ug ucumgal edin-na-ke4
60me-da im-tij4-ba me-a jen-na-ba
61gu3 nam-ur-saj-ja2-bi-ir edin-na ja2-la ha-ba-ni-dag-dag
62sa-du3-a-ta ba-ra-ab-ci-jen-ne-en
63ce-er-tab-ta en-nu-un ba-ra-bi2-ak
64a2 jic la2-a ba-ab-ak jictukul ba-ra-bi2-cubub
65ud zu2 sis-a-bi urudcukur zi-ba he2-bi2-jar
66za-pa-aj2-bi-ce3 gaba-ju10 ba-ra-bi2-zig3
67je26-e tuc-ju10-ce3 ba-ra-ba-ta-jen-ne-en
68ur-saj ur-saj-e gaz-a-gin7
69edin-na nij2 ul4-la-ac hu-mu-ni-ak
70gu3 cubtumx(KASKAL.LAGABxU)-ma ki jiri3 kud-da-ba edin-ba hu-mu-si-si-ig
71tur3 amac ki saj bi2-in-bur2-bur2-ra
72sipad ildum2-ma-bi-ir su-bi hu-mu-dug3
73ud-me-da ud-ul-li2-a-ce3
74ga-nam ac-bi ba-an-da-sig10-ga lu2 nam-mu-un-ci-ib-be2
75ur-mah jictukul-la bi2-til-la-ju10
76a-ra2-bi zag-bi-ce3 cid-bi ba-ra-zu
77nij2-ak-a-ja2 ni2-bi ga-balaj
78kalag-ga-ja2 mu-bi a2 bi2-su3-ud
79jectug2-ju10 nij2-galam-ma sug4-ga-am3
80a-na-ju10 nij2 ka-ge dib-ba-nu
81dcul-gi dijir nam-juruc-a saj-kal erin2-na-me-en
82tir-ra sa i-ni-di ti galam-ma i-ni-gid2
83nij2 cu-man a2-ta ri-a-ja2 jicgag-pan he2-ni-ib-ri-en
84am gal gud an-na sumun2 alim gu3 ib2-de2-de2-e
85kur-ur2-ra saj bal-e-da-bi
86a2 ne3-jal2-la-ja2 ti zu2 mu-ni-in-ri
87u3-ur5-re nij2-la-ga me-dim2
88zi-bi edin-na cub-cub-bu-da-bi
89an-za-gar3 libir-ra-gin7 hu-mu-cubub
90saj-bi jicnaja3 hul-gin7 ki he2-bi2-tag
91ance edin-na-ce3 jices2-ad la-ba-nu2-en pu2 la-ba-ba-al-e
92jicgag u2-tag-ga la-ba-ci-gid2-en
93gaba-ri-ju10-gin7 dug3 bi2-bur2
94gaz tur-ba dur3 sal-la gaz-gin7-nam la-ba-ci-ninni2-de3
95ceg9-bar ne3-jal2-la edin-na kac4 di-da-bi
96ur5-bi jicgag-ta ba-ta-la2
97a2 ac zig3-ga-ju10 ki-a ba-ab-ha-za
98jicgag-pan-ta ka-KEC2-ja2 na-me
99im-ri-a 1-am3 lu2 na-ma-ta-ed2-e
100nitah igi si-sa2-a-me-en
101AB-ru-um ki-iz-ru-um-ma DU-a-ju10-ne
102jicilar sig3-ge-bi gal-zu-me-en
103jicnu11 an-ta cu bar-ra-gin7 kac4 /dug4\-bi
104nij2 bi2-ra-a-ju10 ki-bi nu-zi-zi-i
105nij2-gu2-un-na-ce3 da ba-ri-e
106jicellag nij2 an-na dirig-ga-am3 tug2-gin7 im-ra-ra-an
107nij2-ur2-4 nim-gin7 jir2-re-da a2-sig3 bi2-ib-cubub-be2-en
108dcul-gi-me-en dug3 cu bar-ra-gin7 mac am3-mi-ib2-dab5-be2-en
109a2-ju10 nij2-na-me la-ba-dab5-be2 ma-ga-tum ma-cum2
110ki-jiri3-jen-ju10 nij2 mu-un-jar-jar
111edin-ta du-ju10-ne nij2 mu-un-ci-la2-la2
112ama-ugu-ju10 dnin-sumun2-ka-ra
113dumu nij2-5 nij2-10-ni je26-e-me-en
114nij2-ak-ja2 ni2-bi ga-balaj
115kalag-ga-ja2 mu-bi a2 bi2-su3-ud
116jectug2-ju10 nij2-galam-ma sug4-ga-am3
117a-na-ju10 nij2-ka-ge dib-ba-nu
118lugal-me-en ur-saj cu du7-a kalam-ma kur2-ra-am3
119dcul-gi nir-jal2 usu gal-gal-la-me-en
120kalag-ga-me-en nij2 saj nu-gen6-me-en nij2-hul nu-zu-me-en
121id2-da jicma2-gur8-ju10 gu2 nu-mu-da-ja2-ja2
122ance erin2-na-ju10 zi-bi nu-mu-e-da-cub-be2
123cec gu5-li-ju10 cul dutu-gin7
124za3-ce3 pirij-gin7 sug2-sug2-ge-ja2
125ance sahar la2 ug-gin7 sig14 gi4-a-ja2 kuc7 sag9-ga-bi-me-en
126dur3ur3-gin7 kac4-a ne3-ju10 nu-silig-ge
127kac4-ta ed2-a-me-en dug3 nu-kuc2-u3-me-en
128nam-te nu-jal2-me-en isic-a gud-gu4-ud-me-en
129inim-ju10 nij2 ka-ta nu-cub-bu-dam
130mi2-ju10 di nij2-gen6-na-ka ka-ga14 mu-ci-jal2
131mac2 cu gid2-gid2 zalag-zalag-ga-me-en
132jiri3-jen-na inim UZU-ga-ka dnin-tud-bi je26-e-me-en
133cu-luh-ha nam-icib cu du7-de3
134en-ra za3-mi2 -de3 ji6-par4-ce3 huj-e
135lu2-mah nin-dijir cag4 kug-ge pad3-da
136sig-ce3 saj ja2-ja2 nim-ce3 aga3-kar2 sig10-ge
137e2 cu-nir-ra-ke4 jal2 da13-da13-[X]
138jic-gid2-da a me3 tu5-tu5-[X]
139ki bal-a-ce3 sa2 galam-ma ja2-ja2-[X]
140inim dijir-re-e-ne nij2 kal-kal-la-am3
141sila4 babbar udu kij2 gi4-a-ka i5-jar u3-bi2-jar-jar
142ki mu pad3-da-ba a ece4 ba-ni-de2
143inim sizkur2-ra-ka udu sa am3-mi-ni-ib2-gi4-gi4-in
144mac2 cu gid2-gid2-ju10 na-ja2-ah-gin7 u6 mu-e
145udu sa gi4-a cu-ja2 ma-an-dib
146sag9-ga hul-da la-ba-an-da-ha-ze2-en
147cag4 zalag ni2-ja2-me-en igi-ju10-ta i3-du-un
148lugal-me-en cag4 udu 1-a-kam
149a2 aj2-ja2 nij2 ki car2-ra-ka igi mu-na-ni-du8
150nij2-ak-ja2 ni2-bi ga-balaj
151kalag-ga-ja2 mu-bi a2 bi2-su3-ud
152jectug2-ju10 nij2-galam-ma sug4-ga-am3
153a-na-ju10 nij2 ka-ge dib-ba-nu
154dcul-gi lugal urimki-ma-me-en
155u3 nam-nar-ra gu2-ju10 ha-na-cum2
156nij2-na-me-bi la-ba-da-an-gib-en
157tigi a-da-ab nam-nar cu du7-a buru3 dajal-bi mu-zu
158jic-cu-kar2-ke4 cag4 bi2-ib-dab5
159si ak-de3 a2 nu-mu-e-ci-ib-gaz-e-en
160zi-zi-i cu2-cu2-ba jic mu-e-hur-hur
161jicgu2-uc za-mi2-a kam-ma sag9-ga mi-ni-zu
162jicsa-ec5 u3 cag4 nam-nar-ra-ka cag4 du-bu-la mi-ni-zu
163jicmi-ri2-tum nij2 e2-sig9-ga-ke4 cu mu-un-gid2-gid2-de3
164jical-jar jicsa-bi2-tum in-dim2 lugal-la aga cu-si mu-ni-zu
165jicur-za-ba-bi2-tum jichar-har jicza-na-ru
166jicur gu-la jicdim3 lu2 ma2-gur8-ra ne-gin7 gu3 mi-ni-ed2
167dumu nar-ra cu tam-tam-ma-gin7
168jic gu3 di jic la-ba-ra-ab-tuku-a ki-ju10-uc lu2 mu-ni-ib-DU-[X (X)]
169u3-ne-en cag4-bi ba-zu-zu
170nij2 ud-bi-ce3 cu-ja2 jal2-la-gin7 ba-e-de3-ja2-ja2-de3-[X]
171ad pad3-de3 gid2-i tu-lu gen6-na cu-ja2 la-ba-ra-ed2
172gi di gi sipad-gin7 nu-um-me
173sumun-ca4 ur5 ca4-e i-si-ic ja2-ja2
174cag4 gen6 saj us2-bi-gin7 i3-zu
175hul2-hul2-le-me-en dug3-dug3-ge-me-en
176giri17-zal nam-nun-na ud zal-zal-le-me-en
177lu2-u18-lu ni2-te-a-ni-ce3 jectug2 he2-ja2-ja2
178nij2-bi nij2 igi nijin2-na-ka
179zag nam-til3-la saj im-gi4-a
180ze2 kur nam-gu2-ga-ka lu2 la-ba-an-da13-da13-e
181kalag-ga ne3-ni-ta nir-jal2-la-me-en
182mu mah-a-ni-ta nir-jal2-e
183nij2 he2-em-gu-ul-gu-ul-e a-na-ac ba-ni-ib-la2-e
184ama-ugu-ju10 dnin-sumun2-na-ra ama na-an-da-u3-tud
185hul2-hul2-le-ja2 dug3-dug3-ge-ja2
186a sila3 jar-ra-ju10 mi2-ce3 ma-ni-in-dug4
187nij2-lul-la ka-ka nu-un-jal2
188munus-e tur-ra cu nu-bar-re
189e2-gal-ja2 nij2-hul2-hul2-la ud mi-ni-ib2-zal-zal-e
190dcul-gi-me-en til3-la ud su3-ra2-ka nij2 mi-ni-ib-gu-ul-gu-ul-lu-ja2
191lugal-me-en ud nam-ju10 ba-tar-ra-ta
192til3-la ur5 sag9-ge nij2 gu-ul-gu-ul-lu-ja2
193igi dutu dumu dnin-gal-la-ka-ce3 ba-ra-ma-ni-la2
194lugal-me-en ud til3-la su3-ra2-ce3
195mu-ju10 ud ul-li2-a-ac cir3-re he2-em-dug3-ge
196cir3 zu-ju10-gin7 inim zu-ju10-gin7
197nij2-saj-gi4-a mul-an-bi-me-en
198ni2 saj-ki e2-gal gen6-ne2-dam
199saj-gag gi-ninda iriki du3-du3-u3-dam
200ni2 saj-ki-ju10 a-ba-da-ab-jal2-la-am3
201kur-kur jickab-gin7 a-ba-da-ab-jal2-en-na
202ni2 me-lem4 jickar2 sig10-sig10 cu-ja2
203jicrab-gin7 kalam-ma a-ba-da-jal2-le-na
204nam-tag-ga sig3-ge du8-u3-bi mu-zu
205inim-ma gal-gal-la silim-zu /jal2\-[la-me-en]
206a ed2-a-gin7 gu3 gal ud gal ud a-[X X]
207hi-il-zumki dab5-be2 elam um-ci-[X]
208a2 jal2 inim-ma-bi-ir gaba-ri-ni mu-zu
209dumu ki-en-giki-ra numun-ba je26-e-me-en
210ur-saj ki-en-giki-ra ur-saj je26-e-me-en
2113-kam-ma-ac [lu2] kur gig2-gig2-ga-ke4
212je26-e-me-en [gu2 mu-na]-/de2\-e
2134-kam-ma-ac [mar-tu] lu2 kur-ra a [X (X)]
214eme bal-e mu-un-da-an-gub-be2
215je26-e eme-ni-ta inim-inim kilib-ba-ni si mu-un-na-ab-sa2-e
2165-kam-ma-ac su-bir4ki-a U.NAM.KUR gu3 ra
217eme-na dumu iri-na nu-me-en-na inim ba-an-di-ni-ib-kar-re
218di ki-en-giki-ke4 si sa2-da-ju10-ne
2195-bi eme-bi ba-ni-ib-gi4-gi4-in
220e2-gal-ja2 kac4 inim bal-e eme-e li-bi2-du3-e
221di-til-la-ja2 cag4 uc im-gu7
222gal zu nam-lugal an-ta-jal2-bi-me-en
223unken-jar-ra-ju10 uj3 saj sig10-ga-gin7
224nijir gal si gu3 SA gu3-bi-a ni2 cag4-ga cub-bu-de3
225ad gi4-gi4-da inim car2-car2-dam
226pu-uh2-ru-umki nam tar-tar-re-de3
227caggina-ju10-ne-er ad gi4-gi4 mu-un-zu inim car2-car2 mu-zu
228inim id2-gin7 unu2-ba suh-ra-ba
229nir-da saj i3-tum2-tum2-ja2 ma-da gal-gal-ja2 suhuc ma-ab-ge-en-ge-en
230inim-ta jictukul-gin7 iri lah5-me-en
231nam-kug-zu-ju10 gam-gam-da-bi-gin7
232nam-kalag-ga saj-izi [bar7]-a-gin7
233ama tuku nu-me-en cag4 inim-[ma] mu-zu
234inim-ju10 saj i3-li inim-ma-kam
235cag4 izi-gin7 bar7-a ced10-bi mu-zu
236ka jic-gi-gin7 izi-ba cum2-ma te-en-te-en-bi mu-zu
237inim-ju10 lu2-inim-ma dirig-ga ki mu-un-ci-ib-la2-e
238nij2-kal-kal-la je26-e lu2-bi-me-en
239sun5-na dugud-bi saj-bi ma-kal
240nij2-na-me-ja2 la-ba-da-kar2-kar2-re-de3
241inim an-na inim den-lil-la2-ta
242zi kalam-ma zi kur-kur-ra-ka giri17 cu ca-ba-jal2
243ja2-la nu-dag-ge muc3 nu-tum2-mu-bi-me-en
244dijir-re-e-ne gub-bu in-ga-zu
245da-nun-na-ke4-ne cag4 ced10-de3 mu-zu
246dcul-gi nam-nun-na gu2 gal pec11-a-me-en
247nij2-gal-gal-la a-ba-da-jal2-le-en-na
248cag4-ja2 hul2-la a-ba-da-jal2-la
249nij2 ja2-la dag-dag-ge bar-ce3 nu-cub-be2-me-en
250ur5-gin7 gid2-gid2 saj-jal2-a-me-en
251a2 ki lul-la nu-mu-ci-/aj2\-[ja2]
252a-gar3 gal-gal-e gu2 /mu\-[un-cum2]
253gan2-ne2 gana2 zid-de3 jic /mu\-[ni-in-du3]
254dul saj eg2 pa5-re a2 cum2-/mu\-[me-en]
255i3 gal-gal-me-en siki gal-[gal]-me-en
256gu nam-ju10 mah ce /nam\-[ju10] mah
257enmen2 cag4-jar dijir-re-e-ne-/ka\ cag4-zarah ma-ab-/gu-ul\-gu-ul
258dcul-gi-me-en zi ki-en-gi-ra-me-en
259lugal bad-ba9-ra2 gaba-ri nu-tuku-me-en
260in-ga-ab-be2-en nij2-ju10 nij2-gal-am3
261lugal-me-en a-na-ju10 cu ba-ab-tej3-je26-e
262jectug2 a2 dirig nam-si-sa2-ju10-uc
263inim gen6-na nij2 nu-ha-lam-e-ju10-uc
264dictaran-gin7 di ku5-ru gal zu-ju10-uc
265den-lil2-le a2 uj3 lu-a-na mu-da-an-aj2-ja2-ta
266uri he2-em dumu ki-en-gi-ra he2-em
267ki gu-ti-umki lu2 i-dutu he2-em
268lugal ud ul-li-a 1-ra
269cag4-ju10 nij2-a2-zig3 ba-ra-mu-un-na-ta-ab-de6
270nam-lu2-ulu3 us2-a an-ta sig10-ga-ta
271jectug2 dab5-ba-ba na-ja2-ah-bi nu-me-en-na
272en3-du ud-bi-ta libir-ra ul-li2-a
273tigi za-am-za-am cu ci-tum2-mu-de3
274ud na-me lul-ce3 ba-ra-bi2-pad3 ka-ge ba-ra-bi2-gi4
275nij2 libir-ra-bi en he2-bi-tar-tar cub-bu-de3 ba-ra-bi2-cum2
276tigi za-am-za-am ki di-bi nij2-/na\-[me] jectug2-ga he2-ni-us2
277cir3-gid2-da-bi e2 dug3-ga-ja2 pa ed2 ha-ni-ak
278nij2-cu-ta ba-ra-cub-bu-da-[bi]
279cu nam-nar-ra-ke4 he2-bi2-la2-la2
280cag4 kalam-ma-ke4 izi zal-gin7 he2-bi2-ak
281a-na ab-tuku ur5-re ib2-hul
282a-ba nam-til3 an-na ba-e-ed2
283ud me-da ud ul-li2-a-ce3
284lu2 den-lil2-la2 mu-un-zi-[zi-i]
285tukum-bi je26-e-gin7-nam lugal si-sa2-am3
286mi2 cud3 cir3 nam-kug-zu-ju10
287a2 nam-ur-saj-ja2 ki-jiri3-jen-na-ju10
288lugal-bi-ir e2-gal dug3-ga-na he2-na-an-us2
289nij2 in-na-dug3-ga cag4-ce3 he2-na-gid2
290mi2-ja2 usu-bi he2-en-zi-zi-[i]
291cir3-ja2 a-la-bi he2-en-tum2-tum2-mu
292jectug2 gal-gal-ju10 ur5-da hu-mu-na-ak
293kalag-ga nij2 in-da-sig10-ge-da-gin7
294ki a2-na la-ba-ni-ib-jal2-la-am3
295nij2-nam-ju10-u8 cu ha-ba-an-sig3-sig3-ge me-tec2 hu-mu-i-i
296mu dug3-ga-ju10 he2-en-pad3-pad3-de3
297tukum-bi cag4-ga-ni nij2-erim2 mu-e-ci-ib2-tum3
298nij2-na-me-ja2 saj ba-an-sig3
299lu2 a2-zig3-ga-bi-ir dnanna di he2-en-e
300dutu saj-izi-e cu he2-en-da-ab-ri-e
301lugal-bi ki-jiri3-jen-na he2-du inim-ma-ni al-ze2-er
302un-ga-til3 ud til3-la-ni-a
303nij2-usu-na he2-en-ak en3-du me-da tum3
304lugal-me-en in-ga-zu-a-ta nij2-me-jar gu3 i3-de2
305jectug2 jectug2-ga dirig-ga-ju10-ce3
306um-mi-a-gin7 mu libir-ra-ju10-ce3
307nij2-umun2-a en3-du-ju10 he2-en-pad3-de3 mul-an he2-u3-tud
308sig-ce3 urimki-ma ki sikil-la bi2-mu2
309e2 jectug2 dnisaba mul en3-du-ja2-ka
310nim-ce3 nibruki-a ki-gal-la bi2-gub
311cud3 e2-kur-ra ki he2-us2-sa-ju10-uc
312dub-sar he2-gub cu-ni he2-eb-dab5-be2
313nar he2-gub gu3 hu-mu-un-ne2-re-de2
314e2-dub-ba-a da-ri2 hur nu-kur2-ru-dam
315ki-umun2 da-ri2 hur nu-silig-ge-dam
316jectug2 dab5-ba-ju10 i3-ne-ec2 ne-e ur5-ra-am3
317nij2 ka-ge dib-ba ki-car2-ra
318jiri3-jen-na inim en3-du-ja2-kam a-na mu-ci-jal2-la
319an den-lil2 dutu dinana lul ba-ra-na he2-ge-en
320u3 nam-erim2-e lu2 na-an-ga-am3-me
321ud ne-e mu-sar-ra-ju10-a
322iri nu-mu-un-gul-la bad3 nu-mu-un-sig10-ga-ju10
323kur gi-sig-gin7 nu-mu-un-dub2-ba-ju10
324ar2 zag li-bi2-til-til-la-ju10
325a-na-gin7-nam nar-e en3-du-a mu-ci-ja2-ja2-a
326nij2-umun2-a saj-kal mu da-ri2-kam
327nij2-lul nij2-gen6-na nu-me-a sar-re-bi a-na-gin7-nam
328lugal-me-en a2-ja2 dlama-bi kalag-ga-na cir3-bi-im
329ki-jiri3-jen-na-ju10 nar-e mu-ci-in-jar
330en3-du-ju10 nij2 nu-ha-lam-e-de3
331inim-ju10 nij2 ka-ta nu-cub-bu-de3
332je26-e lugal kalam-ma dug3-ga-me-en
333numun ba-i-i-ta zag uj3 lu-a-ce3
334lugal nij2-ja2 nij2 bi2-in-sig10-ga-am3
335aga-ni an-ne2 ba-ra-ba-ta-an-il2
336jidru-ni barag nam-lugal-la-ta ba-ra-ba-ta-ed3-de3
337kalag-ga nam-kug-zu jectug2 cum2-ma-me-en
338nij2-gal-gal-ja2 zag-bi til-la
339pirij igi urudcukur-ra ga-racsar-gin7 cab-cab-e
340pirij-tur cu zig3-ga igi jicga-rig2 ak gi-gin7 ca5-ca5-dam
341zi-bi ur-gir15-gin7 uruddur10-uc NE.NE-ga
341sumun2 usu gal-gal gud a2 nu-gi4-a
343gud kur-bi-ce3 DU-ba edin-na mi-ni-gaz-za
344kur-ba cu-a bal-e-da-bi
345hur-saj nij2 cag4-ge nu-gid2-i-gin7
346cag4-ge cu nu-tej3-je26-e-gin7 ib2-ak
347inim ib2-ta-DU.DU i-gi4-in-zu lul na-nam
348ki nam-dub-ba inim dugud-dugud-da-bi
349nam-kug-zu-ju10 nam-kalag-ga-ju10
350a2 jal2 taka4-a ki silim-ce3 di-ja2
351mu-un-zu-a-na nu-mu-un-[...]-/na\
352nij2-gen6-na-ju10 nij2-lul-la-gin7
353cu tec2-a mu-un-ru-gu2 ka-tar-ra mu-un-si-il-le
354ur-saj kalag-ga-ni kalag-ga rib-ba-me-en
355dcul-gi jissu-a-ni kur-ra la2-a-me-en
356lugal jictukul a-ru-ub ki bal-na je26-e-me-en
357mu da-ri2-ju10 a2 gal bi2-su3-ud
358i3-ne-ec2 dutu ud ne-a-a
359kur dumu ki-en-gi-ra nu-zu-ba
360sa-dur2 kaskal-bi-ce3 cu la-ba-jal2-la-ba
361zag-ba ka-inim-ma lu2 nu-gub-gub-ba
362cec di4-di4-la2 lu2 inim-ma-bi-ne
363dumu-saj inim u3-tud cir3 kad4 inim kad4-bi-im
364cir3-ja2 mul-an-gin7 gu3 im-de2-e-ne
365inim-ju10-ta X-gin7 ki im-tag-tag-ge-ne
366[...] buru5mucen DU-a-gin7
367[...]-da la-ba-an-dug4
368[...] zag til-la-me-en
368[...] X-ba nir-jal2-me-en
370[...]-a mu-da-an-zu
371[...] nij2 [...] /su3\-ud-da
372[X] X X X X je26-e-me-en
373[X X] X tag-tag-da-bi
374e2-bi-a lu2 si-sa2-bi kun4 dib-be2-me-en
375lu2 mu pad3-da dnanna-me-en
376saj-us2 e2 den-lil2-ka emedu2 an-na-me-en
377dcul-gi-me-en e2-ju10 e2-hur-saj e2-gal e2-gal-bi-im
378ki-tuc nam-lugal-ja2 za3-mi2 gal-gal-la-kam
379hur-saj za-gin3-na-gin7 ca-ba-an-galam-en
380dinana nin dijir-re-e-ne-ke4
381a2-ja2 dlama-bi-im kalag-ga-ja2 cir3-bi-im
382lugal-lugal-e-ne-er dirig-ga-me-en
383nij2-ki-car2-ra-ke4 cu mi-ni-in-du7
384za3-mi2-ju10 dug3-ga-am3
385dnisaba za3-mi2