Custa bella cantone
jamat sos pees e ti faghet ballare
cun vera passione
chi ti faghet sas penas olvidare.
Lestra dogni pessone
custu ballitu lu fetat andare.
Prova su passu ‘e tres
chi a bolu deen andare sos pees
Daghi finit sa die
e i’sa luna in chelu est acherada
ponide fat’a a mie,
s’intendet de sonete sa pesada;
nàzelu puru a chie
istracu si disizat sa corcada:
su sonnu istudade,
totus umpare a passu ‘e tres ballade.
Mirade sas bajanas,
lizeras che alas de mariposa,
bellas chi paren janas,
movèndesi ja sun armoniosas,
dìligas e galanas,
bundantes de sorrisos e grassiosas:
che lizos de candore
a passu ‘e tres ti ponen bonumore.
Sos homines, fieros
che deos de s’istòria romana,
fortes sun e lizeros
ponzende fatu a sa mùsica arcana
ch’ispirat sos sintzeros
sentidos bonos, oras risulanas,
cun bajanas umpare
su passu ‘e tres si ponen a ballare.
Custa bella cantone
jamat sos pees e ti faghet ballare
cun vera passione
chi ti faghet sas penas olvidare.
Lestra dogni pessone
custu ballitu lu fetat andare.
Prova su passu ‘e tres
chi a bolu deen andare sos pees.
Custa bella cantone
jamat sos pees cun vera passione.
Mirade sas bajanas,
armoniosas chi ti paren janas.
Son homines, fieros
fortes, ma ballende sun lizeros.
Totus cantos umpare
a passu ‘e tres depimus ballare.