M’ê fatto na fattura int’ a na nóce,
e nun me mòvo cchiù: stóngo attaccato.
E vaco p’alluccà, me manca ‘a vóce,
‘vaco pe’ m’ addurmì, rèsto scetato.
È viérno, cade ‘a néve e ‘o còre coce;
è state, scòtta ‘o sole e sto’ gelato!
M’ê fatto, sta fattura dóce dóce…
Assassenèlla, e che m’ê cumbinato!
M’ê fatto na fattura int’ a na méla,
M’ê spurtusato ‘o córe c’a vriala:
sóngo arredutto cómm’ a na cannéla,
nun tèngo ‘a fòrza de saglì ‘sta scala!
Nun tèngo ‘a fòrza ‘e fà nu passo sulo,
m’ê arruvinato figliulo figliulo…
E màmmema n’è morta p’o delóre,
strèca malégna, nfama e sènza còre!