Roberto Murolo - Lo guarracino

Lo guarracino ca jéva pe' mare,

lle venne voglia de se 'nzorare

se facette no bello vestito

de scarde de spine pulito pulito

co na perucca tutta 'ngrifata

de ziarelle 'mbrasciolate,

con lo sciabbò, scollo e puzine

de seta 'ngrese fine fine.

Cu li cazune de rezze de funno,

scarpe e cazette de pelle de tunno,

e sciammeria e sciammereino

d'aleche e pile de voje marino,

cu li buttune e buttunèra

d'uocchie de purpe, sécce e fére,

fibbia, spata e schiocche 'ndorate

de niro de sécce e fèle d'achiata.

Doje belle cateniglie

de premmone de conchiglie,

no cappiello aggallonato

de codarino d'aluzzo salato,

tutto posema e steratiello,

ieva facenno lu sbafantiello

e gerava da ccà e da llà;

la 'nnammorata pe se trovà!

La Sardella a lo barcone

steva sonanno lo calascione;

e a suono de trmmetta

ieva cantanno st'arietta:

"E llarè lo mare e lena

e la figlia da sià Lena

ha lasciato lo nnamorato

pecché niente l ha rialato".

Lo Guarracino 'nche la guardaje

de la Sardella se 'nnamoraje;

se ne jette da na Vavosa

la cchiù vecchia maleziosa;

l'ebbe bona rialata

pe mannarle la mmasciata:

la Vavosa pisse pisse

chiatto e tunno nce lo disse.

La Sardella 'nch'a sentette

rossa rossa se facette,

pelo scuorno che se pigliaje

sotto a no scuoglio se 'mpizzaje;

ma la vecchia de la Vavosa

subbeto disse:"Ah schefenzosa!

De sta manera non truove partito

'ncanna te resta lo marito.

Se aje voglia de t'allocà

tanta smorfie nonaje da fa;

fora le zeze e fora lo scuorno,

anema e core efaccia de cuorno".

Cio sentenno la sié Sardella

s'affacciaje a la fenestrella,

fece n'uocchio a zennariello

a lo speruto 'nnammoratiello.

Ma la Patella che steva de posta

lo chiammaje faccia tosta,

tradetora, sbrevognata,

senza parola, male nata,

ch'avea 'nchiantato l'Alletterato

primmo e antico 'nnamorato;

de carrera da chisto jette

e ogne cosa 'lle dicette.

Quanno lo 'ntise lo poveriello

se lo pigliaje Farfariello;

jette a la casa e s'armaje e rasulo,

se carrecaje comm'a no mulo

de scopette e de spingarde,

povere, palle, stoppa e scarde;

quattro pistole e tre bajonette

dint'a la sacca se mettette.

?Ncopp'a li spalle sittanta pistune,

ottanta mbomme e novanta cannune;

e comm'a guappo Pallarino

jeva trovanno lo Guarracino;

la disgrazia a chisto portaje

che mmiezo a la chiazza te lo 'ncontraje:

se l'afferra po crovattino

e po lle dice: "Ah malandrino!

Tu me lieve la 'nnammorata

e pigliatella sta mazziata".

Tuffete e taffete a meliune

le dava paccare e secuzzune,

schiaffe, ponie e perepesse,

scoppolune, fecozze e cunnesse,

scerevecchiune e sicutenosse

e ll'ammacca osse e pilosse.

Venimmoncenne ch'a lo rummore

pariente e amice asce ascettero fore,

chi co mazze, cortielle e cortelle,

chi co spate, spatune e spatelle,

chiste co barre e chille co spite,

chi co ammennole e chi co antrite,

chi co tenaglie e chi co martielle,

chi co torronne e sosamielle.

Patre, figlie, marite e mogliere

s'azzuffajeno comm'a fere.

A meliune correvano a strisce

da sto partito e de chillo li pisce!

Che bediste de sarde e d'alose

da palaje e raje petrose

sarache, dientece ed achiate,

scurme, tunne e alletterate!

Piscepalumme e pescatrice,

scuorfene, cernie e alice,

mucchie, ricciole, musdee e mazzune,

stelle, aluzze e storiune,

merluzze, ruongole e murene,

capodoglie, orche e vallene,

capitune, auglie e arenghe,

ciefere,cuocce, tracene e tenghe.

Treglie, tremole, trotte e tunne,

fiche, cepolle, laune e retunne,

purpe, secce e calamare,

pisce spate e stelle de mare,

pisce palumme e pisce prattielle,

voccadoro e cecenielle,

capochiuove e guarracine,

cannolicchie, ostreche e ancine,

vongole, cocciole e patelle,

pisce cane e grancetielle,

marvizze, marmure e vavose,

vope prene, vedove e spose,

spinole, spuonole, sierpe e sarpe,

scauze, nzuoccole e co le scarpe,

sconciglie, gammere e ragoste,

vennero nfino co le poste.

Capitune, saure e enguille,

pisce gruosse e piccerille,

d'ogni ceto e nazione,

tantille, tante, cchiù tante e tantone!

Quanta botte, mamma mia!

Che se devano, arrassosia!

A centenare le barrate!

A meliune le petrate!

Muorze e pizzeche a beliune!

A delluvio li secozzune!

Non ve dico che bivo fuoco

se faceva per ogne luoco!

Ttè, ttè, ttè, ccà pistulate!

ttè, ttè, ttè, ccà scoppettate!

ttè, ttè, ttè, ccà li pistune!

bu, bu, bu, llà li cannune!

Ma de cantà so già stracquato

e me manca mo lo sciato;

sicché dateme licienzia,

nfi che sorchio na meza de seje,

co salute de luje e de leje,

ca se secca lo cannarone

sbacantànnose lo premmone.