Ma se ghe penso [English translation]

O l'êa partîo sensa 'na palanca,

l'êa zâ trent'anni, fòrse anche ciù.

O l'aveiva lotòu pe mette i dinæ a-a banca

e poèisene un giorno vegnî in zù

e fâse a palasinn-a e o giardinetto,

co-o ranpicante, co-a cantinn-a e o vin,

a branda atacâ a-i èrboi, a ûzo létto,

pe dâghe 'na schenâ séia e matin.

Ma o figgio o ghe dixeiva: «No ghe pensâ

a Zena, cöse ti ghe veu tornâ?!»

Ma se ghe penso alôa mi veddo o mâ,

veddo i mæ monti, a ciassa da Nonçiâ,

riveddo o Righi e me s'astrenze o cheu,

veddo a lanterna, a cava, lazù o Meu...

Riveddo a-a séia Zena iluminâ,

veddo là a Fôxe e sento franze o mâ

e alôa mi penso ancon de ritornâ

a pösâ e òsse dôve ò mæ madonâ.

E l'êa pasòu do tenpo, fòrse tròppo,

o figgio o l'inscisteiva: «Stemmo ben,

dôve ti veu andâ, papà?.. pensiêmo dòppo,

o viâgio, o mâ, t'ê vêgio, no conven!».

«Oh no, oh no! me sento ancon in ganba,

son stùffo e no ne pòsso pròpio ciû,

son stanco de sentî señor caramba,

mi véuggio ritornâmene ancon in zù...

Ti t'ê nasciûo e t'æ parlòu spagnòllo,

mi son nasciûo zeneize e... no me mòllo!».

Ma se ghe penso alôa mi veddo o mâ,

veddo i mæ monti, a ciassa da Nonçiâ,

riveddo o Righi e me s'astrenze o cheu,

veddo a lanterna, a cava, lazù o Meu...

Riveddo a-a séia Zena iluminâ,

veddo là a Fôxe e sento franze o mâ

e alôa mi penso ancon de ritornâ

a pösâ e òsse dôve ò mæ madonâ.

E sensa tante cöse o l'é partîo

e a Zena o gh'à formòu torna o so nîo.