Come corsari della Bovisa, sura un trenu del venerdé sira
Omen o quasi vegnüü de la melma per imparà a restà nel catràmm
Quajvoen l’ha stüdiaa per mea ciapà bott
Quajvoen l’ha crumpaa una cravatta e un giurnaal
Quajvoen l’ha pruvaa a mett soe una divisa
Ma l’ha tegnüü dumà la pistola
Trii rembambii in soel puunt del naviglio
Per pruvà a truvà un quaj riflèss
Che nustalgia dell’acqua del laagh
Ma mai de quela giò in del büceer
Quajvoen l’ha flilaa cun scià una bandiera
Quajvoen l’ha sfilaa dumà i so müdaand
Quajvoen l’ha pruvaa a guidà una pantera
E l’ha tegnüü dumà el lampegiaant
E adess che i sann i culuu del metrò
E adess che i sann in’de l’è la toilette
Se senten padroni de quell tocch de umbriia
Tra el marciapè èl Domm de Milaan
E forsi per luur l’è una gesa troppa granda
E forsi per nà deent ghe voer anca el telepàss
E bisognerà imparà una preghiera cumplicada
E bisognerà imparà una preghiera de città
Per sta bela Madunina che l’è stüfa de brilà
Tropp luntana e piscinina per pudè ancamò scultà
Trii cumè luur
E forsi l’è neda cume l’è nada o forsi cume la duveva nà
Trii omen, trii coer, trii para de ball, trii desten incrusaa a uncinett
Quajvoen l’era stüff de purtà una bandiera
E l’ha faa el prufessuur a l’università
Ma una matena hann truvaa i volantini e un mitra scundüü in de la sua cà
Quell’oltru a l’era un prufessiunista senza stüdià per fa el gigolò
A l’è scapüsciaa ne la dona sbagliada
E in un sacch de coca scundüü in del crüscott
El teerz el faseva la guardia del corpo e anca l’autista per un senatuur
In un sira impestaada de candell e butègli
Per difeend na pelanda l’ha picaa un assessuur
E adess che i sann cume l’è la galera che gh’hann pagüüra de nà a la toilette
I fann un brindisi alla buona condotta tra el marciapè èl Domm de Milann
E l’è tüta per luur questa gésa troppa granda
E forsi per nà deent basta fa quaranta pass
Una preghiera per Bob Marley e per el nonu in paradiis
Una candela a Sant’Ambroes, una candela a San Vituur
E a sta bela Madunina che la riess amò a brilà
La sarà anca piscinina ma la riéss anca a scultà
Trii cumè luur