M'amia.m men'estra lei [poem 24] lyrics

M'amia.m men'estra lei.

No sai per que!

Qu'eu no.lh ai forfach

Pauc ni re,

Si Deus m'aiut

Donc per que s'aira,

Pos eu nulh enoi no.lh fatz

Car li platz!

C'als non i sai

E per so dic que mespren

E car encolpatz no.m sen.

Petit enveiava.l rei!

Mas qu'er m'ave

Que pert ses forfach!

Car del be

Que m'a volgut

Reconosc que.s vira

Per qu'eu marritz sui lonhatz

De solatz

Que ges no n'ai,

Mas chan per abelimen

E per plazer de la gen.

On plus la volh, menhs la vei

Bona vas me.

Si.lh sui ses forfach,

No.lh sove.

Tot es perdut,

Desque no s'albira

Com eu li m'er'autreiatz

En sos bratz,

Per que verai

M'a trobat, e fai parven

Que me tenh'a drech nien.

Deus, qu'en er a vos m'autrei,

Si.lh clam merce

D'eis lo sen forfach

Tenra se

Que.l cor no.lh mut

Qu'eu noca sofrira

- ja no.n fora tan iratz -

Que viatz

E de gran jai

No.lh fenis so falhimen,

Et ilh ses tort me repren

Mas s'ilh ja tem qu'eu desrei,

Prenda m'al fre!

Al primer forfach,

Si ja.l ve,

Quer'altre drut

E, si res li tira

De que.m forses ma foldatz,

Ab un latz

Leis me rendrai

Pel col et am mais, si.m pen,

Que m'aires longamen.

Drechs es qu'ela senhorei!

C'aissi.s conve

Can m'aura forfach

Que jasse

M'a be vencut,

So qu'eu li plevira,

C'anc de l'ora qu'eu fui natz,

Apensatz,

S'ilh s'o retrai,

No fraissi so mandamen

Nescis ni ab escien.

Ges no cre qu'en fol felnei,

Per qu'eu li cre

Molt aver forfach.

Qui la te

Si.lh platz que.m tut

Molt m'en abelira

Sus pel chap colps d'astelatz -

Ab sa patz,

E si.s n'estrai,

Semblara deschauzimen

Dic mal oc, s'ilh o enten.

Joios, al rei fatz prezen

D'un do que.m fetz avinen

E vos, senher No-conten