Er'ai gran joi que.m remembra l'amor [poem 1] lyrics

Er'ai gran joi que.m remembra l'amor

Que.m te mo cor salf en sa fezeltat!

Que l'altr' er vinc en un verger, de flor

Tot gen cobert ab chan d'auzels mesclat,

E can estav' en aquels bels jardis,

Lai m'aparec la bela flors de lis

E pres mos olhs e sazic mo coratge

Si quez anc pois remembransa ni sen

Non aic mas can de leis en cui m'enten.

Ilh es cela per cui eu chan e plor!

Tan mes en me fi talan esmerat

Soven sospir e soplei et azor

Vas lai on vi resplandir sa beltat.

Flors de domnas, cui aclin e grazis,

Es aicela que tan gen m'a conquis,

Dolz' e bona, umils, de gran paratge,

En fachs gentils, ab solatz avinen,

Agradiva vas me a tota gen.

Be fora rics, s'auzes dir sa lauzor,

C'a tota gen vengra l'auzirs en grat!

Mas paor ai que fals lauzenjador

Fel et esquiu, sobredesmezurat

M'entendesson et - a.i trops d'enemis

A cui no platz -- c'om se fassa devis.

Mas can veirai ome de so linhatge,

Baizar l'ai tan, tro la bocha m'i fen!

Tan d'amor port al seu bel cors jauzen

Ja no laissetz per me ni per Amor,

Fals lauzenger complit de malvestat,

E demandatz cui ni cals es ni or,

S'es lonh o pres! c'aisso .us ai ben emblat

C'ans fos eu mortz qu'en aital mot falhis

C'amic non ai be d'aisso no trais!

Car om non es non aia per uzatge

Un fol vezi que.l vai mal enqueren,

Per c'us no.s fiz en filh ni en paren.

Era diran de me escharnidor:

A enfantils com te sos olhs en fat

E s'achambra d'orgolh e de ricor

Qu'eu no consir, s'er' en un gran merchat,

Mas can de leis on mo cor s'es assis

E tenh los olhs viratz vas cel pais

On ilh estai e parl en mo coratge

Ades de leis on mo fi cor s'aten!

Que non ama qui non o fai parven.