Ez sint guotiu niuwe mâre

1 Ez sint guotiu niuwe mâre,

daz die vogel offenbâre

singent, dâ man die bluomen siet.

ze den zîten in dem jâre

5 stüende wol, daz man frô wâre.

leider des enbin ich niet.

mîn tumbez herze mich verriet,

daz muoz unsanfte unde swâre

tragen daz leit, daz mir beschiet.

2 Diu schoenste und diu beste fruowe

zwischen dem Rotten und der Souwe

gab mir blîdeschaft hie bevorn.

daz ist mir komen al ze rouwe

5 von tumbheit und von trouwe,

daz ich ir hulde hân verlorn,

die ich ze der besten hât erkorn

oder in der werlte ieman schouwe.

noch sêre fürht ich ir zorn.

3 Al ze hôhe gernde minne

brâhten mich ûz dem sinne.

dô ich ir ougen unde munt

sach wol stên und ir kinne,

5 dô wart mir daz herze enbinne

von sô süezer tumpheit wunt,

dâz mir wîsheit wart unkunt.

des bin ich wol worden inne

mit schaden sît ze maniger stunt.

4 Daz übel wort sî verwâten,

daz ich nie kunde verlâten,

dô mich betroug mîn tumber wân.

der ich was gerende ûz der mâten,

5 ich bat si in der caritâten,

daz si mich mües al umbevân.

sô vil het ich niht getân,

daz si ein wenic ûz der strâten

durch mich ze unrehte wolte stân.