Time Wears Awa'

Oh but the oors rin fast awa'

Like the Kelvin tae the Clyde

Sin’ on its bonnie gowan banks

I wooed thee for my bride

My ain dear love sae sweet and young

Sae artless and sae fair

Then love was a’ the grief we kent

And you my only care

[Refrain:]

Time wears awa', time wears awa'

And winna let us be

It stole the wild rose frae my cheeks

And the blyth blink frae your ee

When woods were green and flooers fair

While you were a’ my ain

I little reckoned what years would bring

O poortith, toil and pain

Some waefu oors hae flapped their wings

Dark shadows ower oor lot

Sin like twa cushats o yon glen

We strayed in this dear spot

[Refrain:]

Time wears awa', time wears awa'

And winna let us be

It stole the wild rose frae my cheeks

And the blyth blink frae your ee

The voices o these happy days

Steal on oor dreams by night

And cherished mem'ries rise and glow

Wi their depairted light

But still the birds and burnies sing

Their 'wildered melodies

As in the gowden dawn o life

When we were young and free

[Refrain:]

Time wears awa', time wears awa'

And winna let us be

It stole the wild rose frae my cheeks

And the blyth blink frae your ee

It stole the wild rose frae my cheeks

And the blyth blink frae your ee