ئه‌ی چاو چه‌شنی بازی قه‌فه‌س هه‌ڵوه‌رێ په‌ڕت
كوا باڵه تیژه‌كانی نیگای جوانی دولبه‌رت
كوا دوو چاوی مه‌ست كوانێ ؟
كوا برۆی په‌یوه‌ست كوانێ؟
كوانێ زوڵفی ڕه‌ش ؟ كوڵمی ئاڵ و گه‌ش؟
كوا هه‌یكه‌لی جه‌مال ؟ جوانی بێ میسال ؟
ئه‌ی گوێ زه‌لیلی چاوم و به‌ر تۆ په‌نا ئه‌به‌م
ده‌نگێ له یاری دووره‌وه چی بكه‌م له زیل و به‌م
با بێ .. خه‌نده‌ی پڕ ئاهه‌نگ بێ
نه‌غمه‌ی نازی شۆخ و شه‌نگ بێ
زڕه‌ی بازن بێ ، به‌ره‌و لای من بێ
هاڕه‌ی هه‌ناسه‌كه‌ی ، ورشه‌ی كراسه‌كه‌ی
ئه‌ی حیسسی شامه له چاو و گوێچكه مه‌ئیوسم
بۆنێ له‌یاره‌وه دێنێ خیتامی ئه‌فسووسم
با بێ بۆنی هه‌ناسه‌ی بێ ، پڕ به سینه‌م وه‌ك تاسه‌ی بێ
با بێ بۆی مه‌مه‌ی ، له درزی سوخمه‌ی
بۆنی وه‌نه‌وشه گوڵ ، مێخه‌ك ، عه‌تر ، سمڵ
ئه‌ی لامیسه ئه‌گه‌ر چی نه‌بوو ده‌نگ و ڕه‌نگ و بۆ
وه‌ك شێت به عه‌قڵی خامه‌وه خۆم خسته به‌ختی تۆ
كوا ته‌ماسی له‌شی نه‌رمی ؟ كوا له‌زه‌تی كۆشی گه‌رمی ؟
كوا مه‌مكی پڕ چنگ ؟ لیمۆی باخی سنگ ؟