Ninna nanna de Anton'Istene

Ninna nanna pitzinnu, ohi ninna nanna

ti leo in coa e canto a duru duru,

dormi pitzinnu dòrmiti seguru

ca su cane ligau tenzo in sa janna.

Si malos bisos faghes in su sonnu

tue no timas ne piangas mai,

cando t'ischidas, t'ischidet mamai

nèndeti contos de nonna e de nonnu.

Unu cadditu t'apo a comporare

cun sedda bella e ferros de oro;

si passas in Gaddura e Logudoro

totus ti depen invidiare.

Ti ponz'a coddu soga e fusile

e duos canes ti peso pro catza;

canes de Fonne, canes de arratza

pro ti fagher difesa in su cuile.

E poi ti regalo berbeches chentu

e una tanca totu fiorìa,

e una beste de pannu,

una beste de pannu colorida

e t'accumpanzo fintzas a Gennargentu…

E poi ti regalo una fortuna manna

pro ch’ in sa vida no tenzas dolore.

Difèndeti sa vida cun onore

Ninna nanna pitzinnu, ohi ninna nanna.