Skud [tant que] lyrics

Skud ur nessin

Ad nefru lḥebb ɣef ukerfa

Tafat yexsin

Ad as-tiɣzif tnafa

Timessasin

Ad aɣ-ttaǧǧent nezga nerfa

Skud ur d-usin

Yinefran n tlufa

S temqessin

Negzem tagmat nufa

Mi mlalen sin

Ad ten-tebḍu tgerfa

D tixnanasin

I wumi i d-yestufa

Yiḍ ur nefsin

Yis-s i nreqq am yisufa

Yiḍ ur nefsin

I s nreqq am yisufa

Skud nɣelli i wa ur yettamen wa

Skud ur nelli

Nesdukul tiregwa

Tid n tlelli

D taqbaylit a tarwa

D amesbaṭli

Ad aɣ-igezzem tiriwa

Nekkni d qeḍran i neswa

Neẓra akka i iwala yal yiwen

Akked d twekka

I la aɣ-yetterran d iɛdawen

Yiwen n uẓekka

N ccek i aɣ-yegren ger-awen

Neẓra takka

I aɣ-yerwin ismawen

Ansa i d-tekka

Almi nerwa asawen

Neɣfel akken

D wid i aɣ-yebḍan am yibawen

Kra yellan yerka

Ad t-nekkes deg wulawen

Akken azekka

Ad iẓiden akk yimawen

Akken azekka

Ad iẓiden akk yimawen

Ur nɣelli

Yiwen ur yettamen wa

Ad nettili

Nesdukkul tiregwa

Tid n tlelli d taqbaylit a tarwa

Amesbaṭli ur aɣ-igezzem tiriwa

D tagmat d tayri i neswa

Ur nɣelli

Yiwen ur yettamen wa

Ad nettili

Nesdukkul tiregwa

Tid n tlelli d taqbaylit a tarwa

Amesbaṭli mačči ad aɣ-igzem tiriwa

D tagmat d tayri i neswa