Pax in nomine Domini. [English translation]

Pax in nomine Domini

Fetz Marcabrus los motz e·l so.

Aujatz que di:

Cum nos a fait, per sa doussor,

Lo Seingnorius celestiaus

Probet de nos un lavador,

C'anc, fors outramar, no·n fon taus,

En de lai deves Josaphas:

E d'aquest de sai vos conort.

Lavar de ser e de maiti

Nos deuriam, segon razo,

Ie·us o afi.

Chascus a del lavar legor!

Domentre qu'el es sas e saus,

Deuri' anar al lavador,

Que·ns es verais medicinaus!

Que s'abans anam a la mort,

D'aut en sus aurem alberc bas.

Mas Escarsedatz e No-fes

Part Joven de son compaigno.

Ai cals dols es,

Que tuich volon lai li plusor,

Don lo gazaings es enfernaus

S'anz non correm al lavador

C'ajam la boca ni·ls huoills claus,

Non i a un d'orguoill tant gras

C'al morir non trob contrafort.

Que·l Seigner que sap tot quant es

E sap tot quant er e c'anc fo,

Nos i promes

Honor e nom d'emperador.

E·il beutatz sera, --sabetz caus--

De cels qu'iran al lavador

Plus que l'estela gauzignaus!

Ab sol que vengem Dieu del tort

Que·ill fan sai, e lai vas Domas.

Probet del lignatge Cai,

Del primeiran home felho,

A tans aissi

C'us a Dieu non porta honor!

Veirem qui·ll er amics coraus!

C'ab la vertut del lavador

Nos sera Jhezus comunaus!

E tornem los garssos atras

Qu'en agur crezon et en sort

E·il luxurios corna-vi,

Coita-disnar, bufa-tizo,

Crup-en-cami

Remanran inz el felpidor!

Dieus vol los arditz e·ls suaus

Assajar a son lavador!

E cil gaitaran los ostaus!

E trobaran fort contrafort,

So per qu'ieu a lor anta·ls chas.

En Espaigna, sai, lo Marques

E cill del temple Salamo

Sofron lo pes

E·l fais de l'orguoill paganor,

Per que Jovens cuoill avol laus.

E·l critz per aquest lavador

Versa sobre·ls plus rics captaus

Fraitz, faillitz, de proeza las,

Que non amon Joi ni Deport.

Desnaturat son li Frances,

Si de l'afar Dieu dizon no,

Qu'ie·us ai comes.

Antiocha, Pretz e Valor

Sai plora Guiana e Peitaus.

Dieus, Seigner, al tieu lavador

L'arma del comte met en paus:

E sai gart Peitieus e Niort

Lo Seigner qui ressors del vas!