باڵداری ئێسک سووك [Baldarî Êsik Suk] lyrics

ئەی باڵداری ئێسک سووك، بولبولی دەنووک بچووك!

باغچە بە باغچە ئەفڕی، وچانێکی لێ ئەگری

کام سەرچڵ دڵت گرتی. دەنگی لێ ھەڵئەبڕی

کام ئاوازە شیرینە، ڕووناکی و نەشئەی ژینە

بە چوار دەوریا ئەپژێنی، دنیا پێ ئەکەنێنی

لەو گەرووە پچکۆلانە ئەم نەغمە بەرز و جوانە

چۆن دێتە دەر؟ چۆن ئەڕژێ؟

وا گیان ئەسمێ، ھۆش ئەمژێ؟

منیش دەروونم شاد بێ، ملم لە بەند ئازاد بێ،

دەور و پشتم گوڵزار بێ، عومرم یەکسەر بەھار بێ

پەرداخی ئاوم گوڵ بێ، جێی حەسانەوەم چڵ بێ

عەشقم وەك عەشقت پاك بێ، پڕ لە ھیوا و ڕووناك بێ،

ئەبەدی بێ و پڕ جۆش بێ، ئەوەندەی ھی تۆ خۆش بێ

منیش ئەی مەلی پیرۆز، بە یەك چریکەی پڕسۆز

بەستەی وات بۆ ئەخوێنم،کە جوان جوان بلەرزێنم،

ڕووی کام گۆم شین و مەنگە، کام درەخت شۆخ و شەنگە!

کام شاخ کە سەخت و بەرزە، بیخەمە بوومەلەرزە!

کام ئاسمان بێ بنە، ناخی پڕ کەم لە شنە!