Caruófene lyrics

Janche, ròsa, schiavune e screziate,

cinquanta varietà n’aggio mettute.

E cu ‘sti mmane mèje ll’aggio arracquate

e, pe 'sti ccure mèje, sóngo crisciute.

Chélle ch’èrano puche, mo, so’ piante

ca ncéppano e ca schiòppano, a mumento.

Sta n’uócchio p’ògne nùdeco : e vi’ quante !

E cónta ‘sti mazzuóccole : so’ ciénto !

Ma che vulite ? ‘E ffantasìe so’ assaje.

E ce sta chi ne tène cinco o sèje.

I’ ne tèngo una…scèma quantu maje :

Tèngo na fantasìa p’e sciure miéje…

S’aràpeno e s’affàcceno, 'sti sciure,

pe mmiéz’ê fiérre d’o balcòne : e pare

ca càmpano cuntènte..llòro pure

'nziém’a chi tèngo attuórno e me so’ care.

E si’ venuta tu, bèlla e sprezzante..

bèlla e supèrba..bèlla e ‘ndifferènte..

pe t’affaccià, sènza abbadà p’e ppiante

m’ hê spezzate ‘e caruófene, ‘int’a niénte.

E i’ che vulévo fà : Sangue di Bacco !

i’ che dicévo : Guaje a cchi m’ e ttòcca !

i’..guarda…appòsta ‘e te ne dì nu sacco,

sènza parlà…t’aggio vasato..mmócca !!