'O nònno lyrics

'Ncòpp'a na sèggia 'o nònno

passa 'e ghiurnate sane,

ma ll'uócchie nun se vònno

stà férme e manco 'e mmane!

Tutta 'a vicchiézza sója

sta ‘int’a chill'uócchie ca

le tralùceno 'e giòia

quanno cu mmico sta!

Nu pòco aggubbatiéllo,

trèmma int'e ggamme, è ovèro,

ma pecchè è vicchiariéllo,

ma è sano, asciutto, allèro,

abbasta ca ògne tanto

piglia a pezzecatèlla,

opure sbrasa 'o ffuóco

cu tanto 'e mazzarèlla,

è cuntènto e nun dice

mai che male se sènte.

Pare a mme ch’è felice,

ca nun le manca niénte,

e quanno io l'addimmanne:

"Ma quanta ‘nnammurate

aite tenute, 'o no’,

‘o no’, l'aite cuntate?”

“Ma io saccio chésto, mo,

contat’e ttoje ca tiéne

vint'anne e lassa a me,

a me nun me cunviéne

e dì sti fatte a tte!

Io nun so cchiu' figliulo,

sto pe fernì 'o cammino,

a me me serve sulo

'o ffuóco,'o liétto e 'o vino

e per ristura' 'o naso,

sta présa d'erba santa!

T'hê fatto perzuaso

che io mo' tozzo l'uttanta?

Che n'atu ppòco e addio,

pòc'ato e m'arrecètto?

Pircio' vaco truvanno

'o ffuóco, 'o vino e 'o liétto.

Tu pigli e te ne viéne

cu 'e ‘nnamurate? O che?

Cuntate 'e ttoie ca ‘e ttiéne

sèmpe a duzzine! Eh ‘o Pe’!

Na vòta, 'a nnammurata,

nun puo' sapé ched’èra,

na còsa prilibbata,

na ‘mmaculata vèra,

si e no pe nu mumènto,

s'affacciava ô barcóne.

Tu, felice e cuntènto,

facive 'o muschiglióne,

'o sórece 'e speziale

sèmpe fòra 'a vetrina!

Mo, che? Mo è tale e quale

cu cchésti cculumbrine!

Mo chi 'e ttròva , 'e 'ncarrètta

tre o quatto, quanno po

n'ha fatte na purpètta,

passa 'a mano a chi 'e vvo'!

Ched'è? Tu non 'o ssaje

cómme se campa mo?

.....E 'o nònno pezzecaje

“Etci!” “Salute, 'o no!“.