Non ti potho amare [English translation]

Giòvana, inutilmente

ti ses posta in s'isetu

chi deo benzo a ti pedire amore.

Ti giuro francamente

chi non ti tenzo affetu,

pro mores ca amo un àteru fìore.

Si so francu e leale

non t'inde parzat male,

ne b'at motivu 'e mi tenner rancore.

Sos rancores lassamus,

amigos fimis, amigos restamus.

Si non ti potho amare,

ne dàredi recreu

comente dias a cherrer, bella mia,

'nde depes inculpare

solu su coro meu,

chi pro te non dimustrat simpatia.

Su coro umanu est gai,

non si piegat mai:

palpitat cando cheret issu ebbia.

E deo non lu tratenzo,

ma si non t'amat culpa no'nde tenzo.

Pensa de m'olvidare

e cun serenidade

abbandona s'idea ch'as leadu.

Mi dees cunsiderare

comente unu frade,

non comente su tou innamoradu.

Allegra dees istare,

ca non t'at a mancare

cuddu chi t'at sa sorte destinadu,

pro su cale una die

dees olvidare ch'as connotu a mie.

Si so francu e leale

non t'inde parzat male,

ne b'at motivu 'e mi tenner rancore.

Sos rancores lassamus,

amigos fimis, amigos restamus.