وقفة ناصية زمان [Wa'fet Nasyt Zaman] lyrics

"- إنت فاكر رمضان , كان الناس بتعلق زينة

وبتحط ساعات نشارة ملونة .

- كنت لسة هقولك عليها

و بيجوا بواحد يعمل فريم أبيض بدقيق و لا بجبس و يرسم جوه , ده كان فن .

حبل النور فيشته كانت بتتوزع كل يوم على شقة

- إنت فكرتنى بدى كانت رهيبة برضه ,,, أه.

ليها معنى كبير

- طبعا ماحدش يشيل لوحده .

الطبق الى دايما طالع نازل فى كل شقق العمارة .

- أه طبق هو بيجيلك و بيترد و توديه و يجيلك

- وتعمل انت حاجة تملاه و تبعته و يرجعلك تانى دى كانت جميلة .

دلوقتى الموتوسيكل يخش ع البنت عليه تلاتة يخشوا و يقلبوا شنطتها , يقلبوها من دراعها و ياخدوا منها أى حاجة

-ممكن يقرصوها أصلا, من غير أى سبب , و لا عملوا حاجة

-و لا خليوا من الحاجة

- زمان البنت و هى مروحة كانت أول ما بتخش المنطقة خلاص كأنها دخلت البيت أمان"

والدار آمان

فاكرين و لا نقول كمان

وقفة ناصية زمان إدتنا إزاى نملك لسان

موزون بيلاغى الصايع و الضايع و الجنتلمان

كله سيان ,,

قابلنا كل أنماط جنس الإنسان

واتعاملنا فإتبنى جوا الدماغ بوصلة و ميزان

فى جزء الثانية بنعرف نفقس مين جدع و مين جبان

ومين بقلب مات و أسود و مين قلبه بينبض حنان

ومين تشوفه تقول ده هادى و لو نكشته تشوف جنان

ومين غلبان و مين شيطان و جن و قرد و بهلوان

حتى الشقاوة ع الناصية كان ليها أصول

الخناق راجل لراجل مش راجل قصاد أسطول

كات وصمة عار كبيرة إنك تضرب واحد من الضهر

حصل هيحصلك عار ويوصلك للقبر

ماكانش العادى إن القوى بيكسر الأضعف منه

تحس الكل كان مؤمن القوى فى الأقوى منه

من أول محترم شقي حتى المجرم كمان

الكلام ده شفته بعينى فى وقفة ناصية زمان

كنا عزوة للحتة وقفتنا تحبها

ياما وقفات دلوقتى الناس تتمنى هدها

ألفاظ شمال بصوت عالى وحشيشها فايحة منها

إزاى ولاد الحتة يبقوا هما مصدر همها؟

كان يا ما كان

وقفة ناصية زمان

وقفة الناصية إتعلمنا فيها كتير لغات

السغة لمون كانت لغة بنرغى بيها لساعات

لو فى غريب مابينا و مش عاوزين يفهم معنى الحاجات

ساسب حواجب سفهم يتنيل ساجة حالات

و فى كمان لغات جسد سبيل مثال

دى العيدية , و دى الجيزه فوق الكوبرى , و دى الطالبية .

و دى التلات طوابق إلى ناسها مية مية

و ده الهرم و دى نفض , ودى صبرك عليا

وقفة الناصية كانت زى النادي تمام

إتعلمنا فيها هواية إن كانت كلاب أو حمام

وقت الرغى فى الهواية مابيخلصش فيه الكلام

مافيش فلوس عادى برضه مابتموتش الأحلام

عملنا بإيدينا ملعب غية و طبلية و جيم

الحاجة أم الاختراع إسعى إتوكل تتم

ماكانش فيه آيباد تابلت واتساب فيسبوك واكلينلى يومى

يومى كله كان خبرات بشر من فجرى لحد نومى

مش معزول و منطوى قدام شاشات و بالساعات

لأ وسط ناس و مجتمع بشارك فيه بكتير حاجات

ياما حلينا ع الناصية كتير مشاكل و حوارات

أخد الحق حرفة تبات ولعة تصبح رماد

على وضعك يا عم مكى

يا ليلى يا عيني يا ليلى

منطقتى هى الطالبية

يا ليلى يا عيني يا ليلى

يا ليلى يا عيني يا ليلى

يا ليلى يا عيني يا ليلى

فاكرين ولا نقول كمان