Och, wat wor dat fröher schön doch en Colonia lyrics

Watt hätt doch Köln sing Eijenart verloore,

Wie war dat Levve hee am Rhing su nett

Mer es sich selver nit mi rääch em Klore,

Ovv mer ne Fimmel oder keinen hätt.

Dä fremde Krom, et es doch zo beduure,

Als ahle Kölsche schöddelt mer d'r Kopp,

Deit mer sich bloss die Dänz vun hück beluure,

Stüß einem jedes Mol de Heimat op.

Och, wat wor dat fröher schön doch en Colonia

Wenn d'r Franz me'm Nies noh'm »Ahle Kohberg« jing,

Wenn d'r Pitter Ärm en Ärm me'm Appolonia

Stillverjnööch o'm Heimwäch ahn ze knutsche fing.

Die sechs mol zweiunzwanzig bare Penije,

Dat wor ne Wocheluhn vun nem Kommis,

Dä wood verdanz, mer fohlt sich wie de Könije,

De Zech zum Schluss bezahlten dann et Liss.

Die Kavaliere leete mit sich handele,

Wann mer als Mädche Schleß un Kohldamp hatt,

Trok hä en Dösje met jebrannte Mandele,

Die wohten dann jelötsch, bes dat mer satt.

Och, wat wor dat fröher schön doch en Colonia

wenn d'r Franz me'm Nies noh'm »Ahle Kohberg« jing,

wenn d'r Pitter Ärm en Ärm me'm Appolonia

stillverjnööch o'm Heimwäch ahn ze knutsche fing.