Ernesto Murolo - Tammurriata a ll'antica

Figlióle 'e Capemónte,

cu zuóccole e tammórre,

aunìmmoce e abballammo,

ca è fèsta e 'o tiémpo córre.

Ògne òmmo cu tre vizie nasce e mòre,

'o juóco, l'amicizia e 'o primmo ammóre.

Ma, p'e maltrattamènte ca me fa,

‘o ‘nnammurato mio l’aggi’a lassà.

Addivinate quanno?

E addivinate quanno?

Quanno l'auciélle canósceno 'o ggrano,

quanno na ròsa nasce sènza spine

e a Piererótta nun ce so' canzóne.

L'ammóre, 'a ccà nu vaso

e 'a llà na rasulata.

Ma po nu spusalizio

e appriésso na figliata.

Tre vizie téngo 'a cuórpo a mmamma mia,

'e cchiàcchiere, 'a tulètta e 'a gelusia.

E pe 'sta gelusia, nun c'è che fà,

‘o ‘nnammurato mio me vo’ lassà.

Addivinate quanno?

E addivinate quanno?

Quanno Natale càpita d'austo,

quanno 'o Vesuvio 'a Nàpule se spòsta

e 'a Grótta Azzurra nun è cchiù celèste.

Vintiquatt'óre, 'e còre

già sbàttono, abballanno.

Chisà ninnillo mio

che spavo sta tiranno.

E cu che sfizio se po’ fà l'ammóre,

quanno ce so' cuntrarie 'e genitóre.

Io, quanno mamma dice: "Ll'hê 'a lassà"

rispongo toma toma: "'O lasso, oje mà'".

Addivinate quanno?

E addivinate quanno?

Quanno l'auciélle canósceno 'o ggrano,

quanno na ròsa nasce sènza spine

e a Piererótta nun ce so' canzóne.

Addivinate quanno?

E addivinate quanno?

Quanno Natale càpita d'austo,

quanno 'o Vesuvio 'a Nàpule se spòsta

e 'a Grótta Azzurra nun è cchiù celèste.