Giovedì santo ‘o struscio è nu viavai:
Tulèdo è chièna ‘e gènte ‘ntulettata
c’a ppère s’ha da fà sta cammenata
pe mantené n’usanza antica assaje
Mammà, ci andiamo? Jammo, ma che faje?
Vediamo due sepolcri e ‘a passeggiata.
E ‘a signurina afflitta e ‘ncipriata
cérca ‘o marito ca nun tròva maje.
‘A mamma arrèto, stanca pecché ha visto
ca st’atu struscio pure se n’è ghiuto
sènza truvà chill’atu Giusucristo,
s’accosta a figlia: “Titinè, a mmammà,
cca cunsumammo ‘e scarpe”. “L’ho veduto!”
“E me lo hai detto pure un anno fa!”