'O pianino lyrics

Ô puntóne d‘o vico s’è ‘nchiuvato

‘a chiù ‘e mèz’òra nu pianino, e sòna:

sòna na pòlca, sòna na canzòna,

e a ssèntere se spassa ‘o vicenato.

Chi sòna tène ‘a faccia ‘e sfaticato,

e chi canta è na pòvera guagliòna,

ca fa nu sacco ‘e smòrfie, strilla, stòna,

e po vènn’ ‘e ccanzòne che à cantato.

E mèntre attuórno va, da ‘o primmo piano

s’affaccia na signóra vicchiarèlla,

cu ll’uócchie ‘e chianto e ‘o fazzulètto ‘mmano.

E cu nu filo ‘e vóce dice a chélla:

« Ce sta nu muórto !... Jate cchiù luntano ! ».

S’asciutta ll’uócchie e 'nchiude ‘a fenestèlla.