'O pate lyrics

‘O pate è ‘o capo ‘e casa, ‘o ciucciariéllo,

pecché tira ‘a carrètta d’a famiglia.

‘E figlie, ‘a séra, ‘o fanno na quadriglia,

n’applauso appéna sòna ‘o campaniéllo.

Chi ‘a còpp’a sèggia ‘o vo’ tirà ‘o cappiéllo,

chi ‘o lèva ‘a giacca; e st’òmmo se ‘ncuniglia,

nun sape a chi vasà, nu lassa e piglia,

addevènta pur’isso guagliunciéllo.

E chésta scèna priésto ‘o fa scurdà

ca tène ‘a maglia ‘a sótto ch’è spugnata.

— Guè, jatevénne, ca s’ha da cagnà.

Po tutte attuórno â tavula, ‘ncastiéllo.

E quanno ‘a caccavèlla è scummigliata,

appizza ‘e rrécchie pure ‘o cacciuttiéllo.