'A véglia lyrics

Stuto e appiccio ‘a lampadina

tutta ‘a nòtte a ccapo ô liétto:

chélla spina ‘a lèvo e ‘a métto

ciénto vòte anfi’â matina.

Mo m’avòto, mo me stèngo,

mo m’arrógno, mo me gratto.

Mme cummòglio, smanio e sbatto

pecché suónno nun ne tèngo.

Sènto ‘o vico ca se scéta,

sènto ‘o tic d’a funtana;

po nu gallo, na campana.

Sènto st’ànema scuièta.

‘O craparo è già passato,

‘a fenèsta se janchéa.

Pure ‘o sórice smanéa

dint’a carta d’o parato.

Ah, durmì, durmi’ a gghiurnate

cómme a quanno ero guaglióne:

ca, scialanno ‘int’o spurtóne,

nun sentévo ‘e ccannunate.