'A muglièra 'e Masaniéllo lyrics

So' turnate li Spagnuóle,

è fernuta 'a zezzenèlla;

cómme chiàgneno 'e ffiglióle

fòra â via d'a Marenèlla!

'A Riggina 'e ll'òtto juórne

s'è arredótta a ffà 'a vaiassa;

so turnate li taluórne,

'ncòpp'ê frutte tòrna 'a tassa!

Chélla vèsta, tuttaquanta

d'òro e argiénto arricamata,

ll'ha cagnata sta Rignanta

cu na vèsta spetacciata.

'A curóna 'e filigrana

mo ched'è? Curóna 'e spine!

'E zecchine d'a cullana

mo nun sóngo cchiù zecchine!

Li Spagnuóle so' turnate

chiù guappune e preputiénte

e mo ‘a chiàmmano, 'e suldate,

a Riggina d' 'e pezziénte!

E lle danno 'a vuttatélla,

e lle dìceno' a paròla,

e lle tìrano 'a vunnélla...

Essa chiagne, sóla sóla.

Pane niro e chianto amaro,

chianto amaro e pane niro

vanno a ccócchia e fanno 'o paro

cómm'e muónece a Rretiro.

Da Palazzo essa è passata

dint' ô Bbuórgo e vénne ammóre;

téne 'a mala annummenata,

ma nu schianto mmiéz'ô còre!

Dint'ô vascio d'a scasata

mo nce passa ‘o riggimènto;

'a furtuna ll'ha lassata

e le sciòscia malu viénto.

Se facétte accussì lòta,

mòrta 'e famma e de fraggiéllo,

chélla llà ch'era na vòta

'a muglièra 'e Masaniéllo!